《开心大综艺》黄婉恩玩到尽！冇底线走光都唔怕
《开心大综艺之暑假玩到尽》最后一集有多位女嘉宾加入，当中包括黄婉恩（Yancy），今次仲系佢嘅处女骚，特别多谢林盛斌（Bob）邀请佢入组玩︰"真系好多谢Bob！唔系佢，我都唔会咁快有机会上游戏节目，始终我都系新人，第一次参加游戏节目原来系好紧张，好荣幸有份参与，收到通告系劲开心！紧张到拍嘅前一晚瞓唔着，不过拍摄嗰阵好精神！"
喺英国读书嘅Yancy，怕唔系好识啲游戏点玩，临上节目之前重温多次咁多集嘅节目，做足功课了解每个游戏点玩，仲专登搵香港朋友一齐研究。而令佢最深刻嘅游戏系吹啤牌，如果唔小心吹走晒就要罚饮五青汁或者苦茶，点知！就系佢唔小心吹走晒啲卡，搞到全组一齐受罚。问到佢玩游戏会唔会有包袱？Yancy话完全冇︰"真系玩到尽冇底线，玩就玩，大家为咗要赢都好落力！（有冇出猫？）咁又冇，因为我唔叻出猫，哈哈！但有个游戏系男女接飞碟，男仔比较高大易接，我就有推佢哋落水！"
大部分游戏都系喺水上进行，问到怕唔怕得意忘形得滞唔小心走光？Yancy话本身都怕，不过公司有畀到面衫佢哋着，所以都好安心，反而系担心好"样衰"︰"未拍之前个妆好完美，但一落水就咩妆都冇晒，个个都变晒素颜，哈哈！（镜头前第一次素颜？）咁又唔系，之前做《姊姊淘》嘉宾都有素过，不过今次系再有啲担心，因为唔止素颜咁简单，系溶妆！更加恐怖同惊，但最尾玩得开心就得！"佢再话之后都好想参加多啲综艺，因为自觉中文唔太好，游戏节目可以放松啲做自己。
