糖妹撞样全智贤 原来多得叶佩雯！
艺人糖妹近期忙到爆，除咗做TVB《劲歌金曲》主持外，又要赶拍《四十二章经》及《童时爱上你》两出剧集，曝光率多咗，自然搵钱机会相应提升，最近佢就为医美中心做代表言人，由于个形象变晒，由甜姐儿升呢做轻淑女，有广告工作人员喺拍摄硬照时，就话原来佢有啲似全智贤。
佢话今次变靓咗，除多得有医美中心赞助keep住做Facial外，全靠Eric Kwok个老婆叶佩雯（Grace）帮手搞形象，同埋多谢合作咗好多年嘅发型师Green帮佢改造，令佢跳出小妹妹嘅框框，变得有型又有啲女人味！
糖妹接受访问时话："好感激Grace仗义帮忙，每次录《劲歌》都帮我搵衫，甚至连私伙首饰都借埋畀我，佢话我呢个高度，可以用服装配衬搞视觉效果，令我对腿睇起嚟会长啲。"又觉得Grace亲切得好似家姐咁，Grace仲分享当年做歌手嘅心得。而Grace受访时表示："我做形象都系边试边玩，都冇乜压力嘅，同糖妹又系朋友，喺沟通上会易搞好多，我自己都好多朱义盛（首饰），攞出嚟畀佢衬衫，我觉得几好玩啰。"
