开Live呻惨况！温兆伦叹做明星惨过坐监
TVB剧集《流金岁月》最近于深宵时段重播，当年套剧喺2002年首播嘅时候大获好评，当中男主角罗嘉良仲凭呢套剧成功第3度获封视帝！时隔近20年，剧中一众演员包括温兆伦、宣萱、林峯、胡杏儿等依家都各有去向，其中演罗嘉良细佬嘅温兆伦，早已主力喺内地发展，甚少出现喺香港观众面前，佢为咗Keep住人气，佢不时更新社交网，同网友互动，虽然佢拍嘅片通常都系无厘头，又冇乜重点，但系又几受网友欢迎，平均每条片都过万Like，唔讲得少㗎！
佢日前喺屋企开Live，睇到佢面红红，仲系咁对住镜头好激动咁手指指，估计佢应该系饮醉酒，有网友仲嗌佢饮少啲，但系佢都一于懒理，仲自爆惨况话："我们做明星的表面看起来光鲜亮丽，其实比坐牢还惨。我不像别的明星，有人帮忙录视频，所以人气高，我的直播间怎么只有2千人都不到，明明我刚开直播的时候有3万人。"唔知系咪惊佢饮醉酒会讲错嘢，佢太太赵庭即刻揿住佢把嘴，阻止佢继续讲落去，仲叫佢Offline添！
开Live卖女性用品
其实佢近年幕前演出并唔多，但系佢生意瓣数都唔少，大搞房地产同美容美发生意，不时做直播带货都赚咗唔少钱，拥有唔少物业，估计身家都上亿计，佢之前佢开Live卖卫生巾等女性用品，观看直播的人数并不多，只有1千多人睇，但系佢依然落力叫卖，够晒专业获得网民力赞！
