被国泰玩谢滞留美国 吕珊怒插：唔见几十万！
实力派歌手吕珊受疫情影响，由两年前接下的美国巡回演唱会，由今年3月改到4月，再到7月、最终等到11月成行开骚，以为完成个唱就可以松一口气，岂料先系噩梦嘅开始。
依家仲滞留喺洛杉矶超过3星期嘅佢，接受访问时话插爆国泰航空公司临时取消又延误航班，令要畀咗成6位数机票及酒店费等嘅额外费用外，更浪费时间、消磨精神，影响晒之后嘅香港及内地工作，估计再损失20多万，最惨喺洛杉矶等紧机票返港，都唔知要等到几时，令佢好无奈。
佢就以"奇妙之旅"嚟形容美国之行，话原定由芝加哥经洛杉矶再飞返香港，因喺芝加哥机场时办登机手续时，航空公司职员一句唔可以喺洛杉矶放低啲行李，令佢大失预算，佢接受东网访问时话："以前我都经常好似今次咁，喺途经站卸低部分行李，今次我要将啲衫同首饰运番去洛杉矶还畀人，但航空公司一句话唔可以，一定要直接运晒所有行李返香港，我就同航空公司啲地勤人员讲，帮我订机票嘅中介公司话我可以咁做，但航空公司坚持唔可以，又冇提供到任何支援，搞到我要临时取消啲机票，再畀钱扑多程机去洛杉矶。"
辛辛苦苦"抢"到可嘅机票上机飞抵洛杉矶，又要面对另一个大问题，吕珊话："因为取消咗香港嘅机票，临时去咗洛杉矶，就因为啲机票再难扑，我就返唔到香港，之后都工作要延期，就要取消，又唔见咗一笔，唯一庆幸系好多谢有啲艺人朋友帮我顶咗啲圣诞、新年商演，唔使我赔钱畀人。"
佢非常无奈话："原本由A去到B一个直航，话取消就取消，唔可以直接去到，一定要经过C或D几个站先去到目的地，所有更改都要我哋补钱，我系一笔钱，我哋成Crew人又系一笔数，个数仲系好可观，钱就花费咗，时间系最大损失，搭直航只系10几个钟，改来改去又要等转机，要等20几个钟。"
由于仲未有归期，紧接嘅香港、内地圣诞黄金档期工作全部要延期或取消，据知又损失20多万，现时佢最希望返港后，可继续接到新工作作"帮补"，唯一庆幸系其新签经理人临时喺美国帮她接到骚："好多谢经理人阿熙帮我可以喺圣诞节前后都有骚做，唔使喺洛杉矶浪费晒啲时间。"佢向受影响嘅香港合作伙伴致歉。
