吳偉豪升呢擔正有望父子兵上陣 馬德鐘患奇症挑戰高難度 #女神

吳偉豪升呢擔正有望父子兵上陣　馬德鐘患奇症挑戰高難度

吳偉豪升呢擔正有望父子兵上陣　馬德鐘患奇症挑戰高難度無綫小生吳偉豪（Ricco）早前在台慶勇奪「男飛躍」，將升呢男主角拍新劇，挑戰臥底角色。其父吳大強是歌唱節目《中年好聲音》的冠軍大熱，人氣甚高，網民一直期待他們父子檔拍劇，監製亦不排除邀他客串助陣！至於馬德鐘劇中飾演「鏡反射觸覺症」檢控官，難度甚高。吳偉豪近年備受公司重用，之前更在台慶奪得「飛躍進步男藝員」獎，有如打了一支強心針。監製林志華即將開拍奇案式題材新劇《非常檢控觀》，今次吳偉豪將「升呢」做男一，與另一男主角馬德鐘齊齊挑戰高難度角色！向來多演乖乖仔角色的Ricco今次一償心願演臥底及執法人員角色，受訪時開心表示：「我嘅心情係好興奮又期待！我唔係太在意戲份重定輕，但呢個機會好難得！我細細個就受警匪片影響，好似電影《新警察故事》、劇集《學警狙擊》，自己入行一直好想試呢類角色，今次終於畀我遇到喇！」他之前拍攝劇集《回歸》受到監製林志華賞識，指今次對方提供這個難得的機會，他會好好珍惜：「因為佢對我咁有信心，我先冇上次咁緊張。我知道只要跟住佢哋方向，出嚟效果應該唔錯。我睇咗幾集劇本，非常得意，多咗馬德鐘個角色，令到成套劇更有新鮮感。」問到是否要操大隻上陣？他說：「今次可能要成熟啲，又唔使超大隻，自己一直有操，心態上亦已經準備好。」Ricco首次擔正，其父吳大強亦憑《中年好聲音》人氣急升，更成為冠軍大熱，不少網民之前都提議兩父子合作拍劇，問到監製林志華會否達成網民的心願？他直言：「都可以搵佢玩吓嘅，不過吳大強個期都唔係咁易度㗎！有機會可以搵佢客串吓！」陳曉華再遇絕世渣男至於劇中另一主角馬德鐘飾演充滿正義感的檢察官，立意為受害者找出真相，讓他們釋懷。這個角色有罕見的「鏡反射觸覺症」，完全感受到別人的感覺，甚至是痛楚，由於全球只有1、2%人有此症狀，馬德鐘坦言做資料搜集及準備工夫時相當困難，演繹上絕對是一大挑戰：「呢個角色個病好特別，喺網上資料唔多，都要同監製、導演溝通得好清楚，睇吓佢哋想我點演繹、輕重有幾多。都有一定難度，佢除咗感受到人哋嘅感覺、觸感，連痛感都可以同步感受，要睇劇入面嘅Case點表達，觀眾睇落一定有新鮮感。」女主角陳煒則飾演律師，一心向馬德鐘報仇，角色相當「狠」，她受訪時表示：「今次做打官司好叻嘅律師，律師我唔係第一次做，但要真正睇咗劇本先諗點演。我同馬德鐘、吳偉豪合作過，有晒默契，依家淨係想盡快開工。」而陳曉華亦有份參演此劇，今次監製更找來其好拍檔何廣沛客串渣男角色，雙方再次過招。陳曉華之前在《美麗戰場》遇上渣男丁子朗，今次再遭渣男傷害，她說：「我仲未知道實際內容會有啲咩，但都好期待今次角色。雖然已經係第4次同廣沛合作，但就係第一次畀佢欺負，希望出嚟感覺會有驚喜。」何廣沛則坦言今次是新嘗試：「因為我從來未試過做Case人物，多謝林志華監製繼《曙光》後再畀機會我同陳曉華合作，希望觀眾唔會厭啦！咁第4次合作，當然要畀啲突破，其實今次角色難度幾大，暖男做得多，渣男真係第一次，仲要係衰到貼地，我聽古仔嗰陣都聽到呆咗，冇諗過編劇寫呢個角色可以去到咁盡，希望Fans睇完唔好驚咗我啦！」吳偉豪與吳大強同樣有人氣，不少觀眾都期待他們合作。在吳大強的家庭照可見，童年的吳偉豪（左1）已相當精靈。馬德鐘於劇中飾演「鏡反射觸覺症」檢控官，難度甚高。馬德鐘早前去內地登台，大受歡迎。陳曉華再與渣男糾纏，何廣沛都自認是世紀賤男！陳煒飾演牙尖嘴利的律師，視馬德鐘為仇人。小花輪流客串　江嘉敏窺探心理無綫劇集《非常檢控觀》包含8個不同案件，全部耐人尋味，甚有啟發性。馬德鐘、吳偉豪及陳煒貫穿整套劇，而多位無綫小花都會客串助陣，包括江嘉敏、戴祖儀及羅毓儀等。當中江嘉敏飾演心理治療師，與吳偉豪有不少對手戲，至於甜姐兒羅毓儀的角色與靈異事件有關，劇中她以為父親已死，經常撞鬼！江嘉敏之前在《新四十二章》的男仔頭造型不討好，但憑演技挽回聲勢，頭髮長了不少的她近日積極做運動，旋即變回美少女。她受訪時表示：「之前公司成日安排我拍飲食節目，所以我真係好努力Keep fit，比平時努力好多，依家有啲成績喇！」對於客串《非》劇，她指還未收到公司通知，不過監製找她客串，相信角色會特別好玩。她又透露月底將與薛家燕到馬來西亞登台，現時積極練歌：「今次我首次挑戰自彈自唱，所以都去咗謝東閔同吳業坤新開嘅音樂中心上堂，佢哋輪流幫我執正啲音同字。」戴祖儀（左）與羅毓儀都會在《非》劇登場。江嘉敏準備開新劇，最近還要為出埠登台練。